AFM-ի թիմը վերլուծել է՝ ինչպես է ESG-ի ներդրումը փոխում Հայաստանի ֆինանսական համակարգն ըստ ԿԲ-ի հաշվետվության
2026 թ․ մարտի 9-ին Կենտրոնական բանկը հրապարակել է Հայաստանի ֆինանսական համակարգի 2025 թ․ կենսակայունության հաշվետվությունը։ Փաստաթուղթը ներկայացնում է, թե ինչպես են բանկերն ու ֆինանսական կազմակերպությունները Հայաստանում սկսում կիրառել «կայուն ֆինանսների» սկզբունքները և ինչ քայլեր են իրականացվում կլիմայական և սոցիալական ռիսկերը նվազեցնելու համար։
Ի՞նչ է նշանակում «կայուն ֆինանսներ»
Հաշվետվության հիմքում ESG կամ ԲՍԿ սկզբունքներն են՝ բնապահպանական, սոցիալական և կառավարման չափանիշներ, որոնք պետք է ներառվեն ֆինանսական որոշումների ընդունման գործընթացում։
Սա նշանակում է, որ ֆինանսական համակարգը սկսում է հաշվի առնել ոչ միայն եկամտաբերությունը, այլ նաև․
- շրջակա միջավայրի վրա ազդեցությունը
- սոցիալական պատասխանատվությունը
- կառավարման թափանցիկությունը
Այս մոտեցումը պետք է նպաստի երկարաժամկետ և կայուն տնտեսական աճին։
Հաշվետվության համաձայն՝ Կենտրոնական բանկն ակտիվորեն աշխատում է այս սկզբունքները ֆինանսական համակարգում ներդնելու ուղղությամբ։
Հիմնական ուղղությունները ներառում են.
- կլիմայական և ESG ռիսկերի գնահատում և կառավարում
- կանաչ ֆինանսավորման զարգացում
- միջազգային ֆինանսական կազմակերպությունների հետ համագործակցություն
- կայուն ֆինանսական գործիքների զարգացում բանկային համակարգում
Ինչո՞ւ է սա կարևոր տնտեսության համար
ԿԲ-ի գնահատմամբ՝ կայուն ֆինանսների ներդրումը կարող է.
- ավելացնել միջազգային ներդրողների հետաքրքրությունը Հայաստանի նկատմամբ
- խթանել «կանաչ» նախագծերի ֆինանսավորումը
- բարձրացնել ֆինանսական համակարգի կայունությունը երկարաժամկետ հեռանկարում
Բացի այդ, արդեն իրականացվում են ծրագրեր միջազգային գործընկերների հետ՝ ներառյալ Վերակառուցման և զարգացման եվրոպական բանկը (EBRD), Համաշխարհային բանկը և այլ կազմակերպություններ, որոնք աջակցում են կայուն ֆինանսների զարգացմանը Հայաստանում։
Ի՞նչ է սա նշանակում քաղաքացիների և բիզնեսի համար
Ֆինանսական համակարգում աստիճանաբար կհայտնվեն նոր «կանաչ» և կայուն ֆինանսական պրոդուկտներ՝ օրինակ՝
- էներգաարդյունավետ նախագծերին տրամադրվող վարկեր
- կայուն զարգացման նպատակներին ուղղված ֆինանսավորում
- ESG չափանիշներին համապատասխան ներդրումային գործիքներ
Այս ուղղությունն առաջիկա տարիներին կարող է դառնալ Հայաստանի ֆինանսական համակարգի զարգացման կարևոր շարժիչներից մեկը։
Կայուն ֆինանսների զարգացումը կարևոր ազդակ է միջազգային ֆինանսական կազմակերպությունների և ներդրողների համար, քանի որ այն բարձրացնում է ֆինանսական համակարգի թափանցիկությունն ու կանխատեսելիությունը։
Հեղինակ
Սաթի ԱվագյանԱղբյուր
AFMՊատկերի աղբյուր
PexelsԹեմա
Ֆինանսական նորություններ, Հայաստանի Կենտրոնական բանկ, Ներդրումներ, Ֆինանսների մասին՝ պարզ լեզվով