Երկրորդ սերնդի «հին» թղթադրամները օրինական վճարամիջոց են մինչև 2026 թ․ ապրիլի 15-ը

ՀՀ երկրորդ սերնդի թղթադրամները կմնան օրինական վճարամիջոց մինչև 2026 թ․ ապրիլի 15-ը։ Այդ ժամկետից հետո նշված թղթադրամները կփոխարինվեն և աստիճանաբար դուրս կբերվեն կանխիկ դրամաշրջանառությունից։

Այս մասին հայտնել է Հայաստանի կենտրոնական բանկ-ը՝ ներկայացնելով փոխանակման ժամկետներն ու պայմանները։

Ի՞նչ կփոխվի 2026 թ․ ապրիլի 15-ից հետո

1. 2026 թ․ ապրիլի 15-ից հետո քաղաքացիները կարող են անվճար և առանց սահմանափակումների փոխանակել երկրորդ սերնդի բոլոր թղթադրամները ՀՀ տարածքում գործող առևտրային բանկերում, Հայաստանի կենտրոնական բանկում։
2. Գումարի կամ քանակի վերաբերյալ սահմանափակումներ չեն նախատեսվում։

Ինչո՞ւ են թղթադրամները դուրս բերվում շրջանառությունից

2025 թ․ ապրիլի 28-ին Կենտրոնական բանկը հայտարարել էր, որ ԿԲ խորհրդի որոշմամբ երկրորդ սերնդի թղթադրամները բնական մաշվածության արդյունքում 2026 թ․ ապրիլի 15-ից կհանվեն շրջանառությունից։

Ավելի վաղ՝ 2017 թ․ հուլիսի 11-ի մամուլի հաղորդագրության մեջ, Կենտրոնական բանկը նշել էր, որ երկրորդ սերնդի թղթադրամները շրջանառությունից դուրս կբերվեն միայն այն դեպքում, երբ դրամաշրջանառության ամբողջ շղթայում ամբողջությամբ ներդրված լինեն երրորդ սերնդի թղթադրամները, երկրորդ սերնդի թղթադրամները ունենան շրջանառության համար ոչ պիտանի ֆիզիկական մաշվածություն։

Դրամաշրջանառության ներկայիս իրավիճակը

Ըստ Կենտրոնական բանկի տվյալների, երկրորդ սերնդի թղթադրամների հիմնական մասը ներկայումս ունի բարձր ֆիզիկական մաշվածություն։

Շրջանառության մեջ գտնվող 1 000, 5 000, 10 000 և 20 000 դրամ անվանական արժեքների դեպքում գերակշռում են երրորդ սերնդի թղթադրամները՝ Պարույր Սևակի, Վիլյամ Սարոյանի, Կոմիտասի և Հովհաննես Այվազովսկու դիմապատկերներով,։

Այս հանգամանքներն էլ հիմք են հանդիսացել երկրորդ սերնդի թղթադրամները շրջանառությունից դուրս բերելու որոշման համար։

Շրջանառությունից դուրս կբերվեն ՀՀ երկրորդ սերնդի հետևյալ թղթադրամները՝

1. 1999 թվականի թողարկման 500 դրամ՝ Ալեքսանդր Թամանյանի դիմապատկերով,
2. 1999, 2001, 2011 և 2015 թվականների թողարկման 1 000 դրամ՝ Եղիշե Չարենցի դիմապատկերով,
3. 1999, 2003, 2009 և 2012 թվականների թողարկման 5 000 դրամ՝ Հովհաննես Թումանյանի դիմապատկերով,
4. 2003, 2006, 2008 և 2012 թվականների թողարկման 10 000 դրամ՝ Ավետիք Իսահակյանի դիմապատկերով,
5. 1999, 2007, 2009 և 2012 թվականների թողարկման 20 000 դրամ՝ Մարտիրոս Սարյանի դիմապատկերով։

Կենտրոնական բանկի որոշումը կրում է տեխնիկական և պլանային բնույթ և չի ստեղծում ռիսկեր քաղաքացիների համար։ Մինչև 2026 թ․ ապրիլի 15-ը երկրորդ սերնդի թղթադրամները կարելի է օգտագործել առանց սահմանափակումների, իսկ այդ ժամկետից հետո՝ հանգիստ և անվճար փոխանակել բանկերում կամ Կենտրոնական բանկում։