Հայաստանի կին ձեռներեցները կստանան խոշոր դրամաշնորհներ․ մեկնարկում է She's Next նախաձեռնության 3-րդ փուլը

Թվային վճարումների ոլորտի համաշխարհային առաջատար Visa ընկերությունը հայտարարում է Հայաստանում «She's Next, Empowered by Visa» գլոբալ նախաձեռնության երրորդ ալիքի մեկնարկի մասին: Ծրագիրն իրականացվում է Վերակառուցման և զարգացման եվրոպական բանկի (ՎԶԵԲ) հետ համագործակցությամբ և Հայկական բարեգործական ընդհանուր միության (ՀԲԸՄ) աջակցությամբ, որը հանդիսանում է նախաձեռնության գործառնական գործընկերը Հայաստանում:

Մրցույթի նոր ձևաչափը և ժամկետները

Այս տարի նախագիծն առաջին անգամ կանցկացվի դինամիկ մրցույթի՝ Elevator Pitch ձևաչափով: Սա թույլ կտա մասնակիցներին սեղմ ժամկետում վստահ ներկայացնել իրենց բիզնես գաղափարները, ինչը վճռորոշ հմտություն է ներդրումների և նոր գործընկերների ներգրավման համար:

Հայտերի ընդունումը մեկնարկում է այսօր՝ 2026թ. հունվարի 12-ին, և կտևի մինչև հունվարի 31-ը: Մասնակցության հնարավորություն ունեն Հայաստանի բոլոր մարզերի այն կին ձեռներեցները, որոնք տիրապետում են բիզնեսի առնվազն 51%-ին և ունեն մեկ տարուց ավելի գործունեության փորձ:

Ուսուցում և մրցանակային ֆոնդ

Անկախ ժյուրիի կողմից ընտրված լավագույն 10 մասնակիցները կանցնեն ՎԶԵԲ-ի կազմակերպած համապարփակ դասընթացները՝ խորացնելով գործնական հմտությունները ֆինանսների, մարքեթինգի և փիչինգի ոլորտներում:

Մրցույթի ավարտին կընտրվեն երեք հաղթողներ, որոնք կստանան զարգացման դրամաշնորհներ հետևյալ չափերով`

1. 1-ին տեղ՝ 2 000 000 դրամ
2. 2-րդ տեղ՝ 1 800 000 դրամ
3. 3-րդ տեղ՝ 1 600 000 դրամ

Հետաքրքրված թեկնածուները կարող են ծանոթանալ կանոններին և լրացնել առցանց դիմումը մինչև հունվարի 31-ը:

Աղբյուրը՝ Banks.am