Հայաստանում կմեկնարկի բնակարանային ապահովման նոր ծրագիր Արցախից տեղահանվածների համար

Հուլիսի 1-ից Հայաստանում կմեկնարկի պետական աջակցության նոր ծրագիր՝ նախատեսված Արցախից բռնի տեղահանված այն անձանց համար, ովքեր ընդգրկված չեն բնակարանների տրամադրման գործող ծրագրերում:

Համաձայն նախաձեռնության՝ պետությունը ընտանիքի յուրաքանչյուր անդամի համար ամսական կհատկացնի 40 000-ական դրամ (մոտ $100)։ Վճարումները նախատեսված են 10 տարի ժամկետով և ուղղված են բնակարանի վարձակալության ծախսերը հոգալուն:

Զուգահեռաբար, այս ընտանիքները կընդգրկվեն սոցիալական բնակարանների ստացման հերթացուցակում, որոնք կտրամադրվեն շինարարության ավարտին զուգընթաց:

Այսպիսով, ծրագիրը համատեղում է կարճաժամկետ աջակցությունը (վարձակալություն) և երկարաժամկետ լուծումը (սոցիալական բնակարան)՝ մասնակիորեն բավարարելով այն ընտանիքների կարիքները, որոնք նախկինում դուրս էին մնացել պետական օժանդակության մեխանիզմներից:

AFM-ի թիմը շարունակում է հետևել ծրագրի իրականացման մանրամասներին, այդ թվում՝ շահառուների ընտրության չափանիշներին, ձևակերպման կարգին և բնակարանների տրամադրման ժամկետներին: