Ինչպես գնել բաժնետոմսեր Հայաստանում։ Քայլ առ քայլ ուղեցույց

Հայաստանում շատերի համար ներդրում կատարել դեռևս նշանակում է գումարը պահել բանկային ավանդում կամ գնել անշարժ գույք։ Այս տարբերակները ապահովում են որոշակի կայունություն, սակայն դրանք միակը չեն խնայողությունները ժամանակի ընթացքում մեծացնելու համար։ Բաժնետոմսերը ևս մեկ տարբերակ են ներդրողի համար։ Դրանք թույլ են տալիս դառնալ ընկերության փոքր բաժնեմասի սեփականատեր և ստանալ եկամուտ շահաբաժինների և բաժնետոմսերի արժեքի աճի միջոցով։

Այսօր Հայաստանում ներդրողները հնարավորություն ունեն գնելու ինչպես տեղական կազմակերպությունների բաժնետոմսեր, այնպես էլ հայտնի միջազգային կազմակերպությունների բաժնետոմսեր, որոնք ցուցակված են խոշոր արտասահմանյան բորսաներում։ Սա ներդրողներին հնարավորություն է տալիս մասնակցելու տեխնոլոգիական, ֆինանսական, առողջապահական, էներգետիկ, սպառողական ապրանքների և այլ ոլորտներում գործող բիզնեսների աճին։ Սակայն, ի տարբերություն բանկային ավանդի, բաժնետոմսերում ներդրումը երաշխավորված եկամտաբերություն չի ապահովում, իսկ բաժնետոմսերի գները կարող են ինչպես աճել, այնպես էլ նվազել։

Բաժնետոմսեր գնելու գործընթացը սկզբում կարող է թվալ բարդ։ Ո՞ր բանկը, ներդրումային ընկերությունը կամ բրոքերին ընտրել։ Որքա՞ն գումար է անհրաժեշտ սկսելու համար։ Ո՞ր շուկաներին կարելի է հասանելիություն ստանալ։ Ի՞նչ միջնորդավճարներ, պահառության վճարներ և արտարժույթի փոխարկման ծախսեր պետք է հաշվի առնել։ Եվ ինչպե՞ս նվազեցնել ոչ ճիշտ ներդրումային որոշում կայացնելու ռիսկը։

Հայաստանում բաժնետոմսեր կարելի է գնել բանկի, լիցենզավորված ներդրումային ընկերության կամ բրոքերային հարթակի միջոցով, որը սպասարկում է Հայաստանի Հանրապետության ռեզիդենտներին։ Դրա համար ներդրողին անհրաժեշտ է բացել բրոքերային և արժեթղթերի հաշիվ, համալրել հաշիվը, ընտրել ցանկալի բաժնետոմսերը և ներկայացնել գնման հայտ հավելվածի, առցանց հարթակի կամ ընտրված կազմակերպության բրոքերային բաժնի միջոցով։

Հայկական բաժնետոմսերը սովորաբար ձեռք են բերվում այն կազմակերպությունների միջոցով, որոնք հասանելիություն են տալիս Հայաստանի ֆոնդային բորսային, իսկ արտասահմանյան բաժնետոմսերը՝ այն բրոքերների միջոցով, որոնք հասանելիություն են տալիս միջազգային շուկաներին։ Ստորև կներկայացնենք, թե ինչպես է ընթանում այս գործընթացը, որ բաժնետոմսերն են հասանելի ներդրողներին Հայաստանում, և ինչ ռիսկեր ու վճարներ է պետք հաշվի առնել։

Այս ուղեցույցի միջոցով քայլ առ քայլ կներկայացնենք, թե ինչպես գնել բաժնետոմսեր Հայաստանում՝ սկսած բրոքերի ընտրությունից և հաշվի բացումից մինչև բաժնետոմսերի գնումն ու ներդրման կառավարումը։

Ի՞նչ են բաժնետոմսերը և ինչպես կարելի է եկամուտ ստանալ դրանցից

Բաժնետոմսը, ըստ էության, կազմակերպության մեջ փոքր մասնաբաժին ունենալու փաստաթուղթ է։ Երբ գնում եք բաժնետոմսեր, դառնում եք այդ ընկերության բաժնետերերից մեկը։ Ձեր մասնաբաժինը կախված է այն բանից, թե քանի բաժնետոմս ունեք՝ համեմատած ընկերության թողարկած բաժնետոմսերի ընդհանուր քանակի հետ։ Որոշ բաժնետոմսեր կարող են նաև ապահովել քվեարկության իրավունք՝ հնարավորություն տալով բաժնետերերին մասնակցել որոշ կորպորատիվ որոշումների կայացմանը։ Սակայն անհատ ներդրողների մեծ մասը բաժնետոմսեր գնում է հիմնականում ֆինանսական եկամուտ ստանալու նպատակով։

Գոյություն ունի բաժնետոմսերից եկամուտ ստանալու երկու հիմնական տարբերակ։

Առաջինը բաժնետոմսի գնի աճն է, որը կոչվում է նաև կապիտալ շահույթ։ Օրինակ՝ ենթադրենք, որ գնում եք ընկերության 10 բաժնետոմս՝ յուրաքանչյուրն 50 ԱՄՆ դոլար արժեքով, և ընդհանուր առմամբ ներդնում եք 500 ԱՄՆ դոլար։ Եթե հետագայում բաժնետոմսի գինը բարձրանում է մինչև 65 ԱՄՆ դոլար, և դուք վաճառում եք այդ բաժնետոմսերը, ստանում եք 650 ԱՄՆ դոլար։ Ձեր շահույթը, մինչև միջնորդավճարներն ու հարկերը, կկազմի 150 ԱՄՆ դոլար։

Երկրորդ տարբերակը շահաբաժիններն են։ Շահաբաժինը վճար է, որը ընկերությունը իր գործունեության ընթացքում ստացած շահույթից բաշխում է բաժնետերերի միջև։ Օրինակ՝ եթե ընկերությունը վճարում է տարեկան 2 ԱՄՆ դոլար շահաբաժին մեկ բաժնետոմսի դիմաց, իսկ դուք ունեք 10 բաժնետոմս, կարող եք ստանալ 20 ԱՄՆ դոլար։ Սակայն ընկերությունները պարտավոր չեն շահաբաժին վճարել և կարող են նվազեցնել կամ չեղարկել դրանք։

Բաժնետոմսերից եկամուտը երբեք երաշխավորված չէ։ Բաժնետոմսերի գները կարող են նվազել թույլ ֆինանսական արդյունքների, տնտեսական փոփոխությունների, ոլորտային խնդիրների, քաղաքական զարգացումների կամ ընդհանուր շուկայական պայմանների պատճառով։ Եթե բաժնետոմսերը վաճառվում են ավելի ցածր գնով, քան գնվել են, ապա ստացվում է վնաս։ Շահաբաժնային եկամուտը նույնպես երաշխավորված չէ, քանի որ ընկերությունները պարտավոր չեն շահաբաժիններ բաշխել և կարող են ցանկացած պահի նվազեցնել, կասեցնել կամ դադարեցնել վճարումները։

Բաժնետոմսեր և պարտատոմսեր

Բաժնետոմսերն ու պարտատոմսերը երկուսն էլ ներդրումային գործիքներ են, սակայն դրանք տարբեր հարաբերություններ են ստեղծում ներդրողի և թողարկողի միջև։

Երբ գնում եք բաժնետոմս, դառնում եք ընկերության մասնակի սեփականատեր։ Ձեր եկամուտը հիմնականում կախված է բաժնետոմսի գնի փոփոխությունից և ընկերության կողմից վճարվող շահաբաժիններից։ Ո՛չ կապիտալի շահույթը, ո՛չ էլ շահաբաժինները երաշխավորված չեն։

Երբ գնում եք պարտատոմս, գումար եք տրամադրում պետությանը, բանկին կամ ընկերությանը։ Թողարկողը պայմանագրով պարտավորվում է կատարել պարտատոմսի պայմաններով սահմանված կուպոնային վճարումները և մարման ժամկետում վերադարձնել պարտատոմսի անվանական արժեքը։ Սա պարտատոմսերից եկամուտը սովորաբար ավելի կանխատեսելի է դարձնում, քան բաժնետոմսերից ստացվող եկամուտը։ Ի տարբերություն բաժնետերերի՝ պարտատերերը չեն դառնում թողարկողի կազմակերպության սեփականատեր և սովորաբար չեն ստանում քվեարկության իրավունք։

Արդյոք հարկվու՞մ են բաժնետոմսերից ստացված շահույթն ու շահաբաժինները Հայաստանում

Անհատ ներդրողի կողմից բաժնետոմսերի սովորական վաճառքից ստացված եկամուտը, որպես կանոն, Հայաստանում ազատված է եկամտային հարկից՝ ՀՀ հարկային օրենսգրքի 149-րդ հոդվածի համաձայն։ Շահաբաժինները, որպես կանոն, հարկվում են 5% դրույքաչափով՝ 150-րդ հոդվածի 8-րդ մասի համաձայն։ Սակայն Հայաստանի ֆոնդային բորսայում ցուցակված կամ առևտրի թույլատրված բաժնետոմսերից ստացված շահաբաժինները ազատված են հարկերից։ Արտասահմանյան կազմակերպությունների շահաբաժինները, որպես կանոն, ենթակա են Հայաստանում 5% հարկման, սակայն արտերկրում պահված հարկը կարող է հաշվանցվել Հայաստանի հարկային պարտավորության դիմաց՝ ՀՀ հարկային օրենսգրքի 20-րդ հոդվածով սահմանված սահմաններում։

Բաժնետոմսերի տեսակները

Բաժնետոմսերը կարելի է դասակարգել ըստ տարբեր գործոնների։ Ամենակարևոր տարբերակումը սովորական և արտոնյալ բաժնետոմսերի միջև է։ Բաժնետոմսերը կարող են նաև դասակարգվել ըստ ընկերության չափի, աճի ներուժի, շահաբաժնային քաղաքականության կամ ռիսկի մակարդակի։

Սովորական բաժնետոմսեր

Սովորական բաժնետոմսերը ամենալայն շրջանառություն ունեցող բաժնետոմսերն են։ Երբ ներդրողները գնում են սովորական բաժնետոմսեր, նրանք դառնում են ընկերության մասնակի սեփականատեր և ստանում են քվեարկության իրավունք։ Սա կարող են բաժնետերերին հնարավորություն տալ քվեարկել, օրինակ, խորհրդի անդամների ընտրության կամ կարևոր կորպորատիվ որոշումների վերաբերյալ։

Սովորական բաժնետերերը կարող են նաև շահաբաժիններ ստանալ, սակայն այդ վճարումները երաշխավորված չեն։ Ընկերությունը կարող է որոշել նվազեցնել, կասեցնել կամ չեղարկել շահաբաժինները։ Եթե ընկերությունը լուծարվում է, սովորական բաժնետերերը սովորաբար վճարվում են միայն պարտատերերից և արտոնյալ բաժնետերերից հետո։

Արտոնյալ բաժնետոմսեր

Արտոնյալ բաժնետոմսերը համատեղում են բաժնետոմսերի և պարտատոմսերի որոշ հատկանիշներ։ Արտոնյալ բաժնետերերը սովորաբար շահաբաժիններ են ստանում սովորական բաժնետերերից առաջ, իսկ շահաբաժնի չափը կարող է լինել ֆիքսված։

Սակայն արտոնյալ բաժնետոմսերը հաճախ տալիս են սահմանափակ կամ ընդհանրապես չեն տալիս քվեարկության իրավունք։ Բացի այդ, սովորական բաժնետոմսերի համեմատ՝ դրանց գները երկարաժամկետ հեռանկարում չեն ունենում աճի մեծ միտում։ Արտոնյալ բաժնետոմսերը կարող են հետաքրքիր լինել այն ներդրողների համար, որոնք առաջնահերթություն են տալիս կանոնավոր եկամտին, ոչ թե քվեարկության իրավունքին կամ բարձր կապիտալ աճին։

Ներդրողներին հասանելի բաժնետոմսերը Հայաստանում

Հայաստանում ներդրողները կարող են հասանելիություն ունենալ բաժնետոմսերի մի քանի տեսակի։ Դրանք ներառում են Հայաստանի ֆոնդային բորսայում առևտրի թույլատրված բաժնետոմսերը, հանրային կամ մասնավոր տեղաբաշխումների միջոցով առաջարկվող բաժնետոմսերը, մասնավոր գործարքներով վաճառվող չցուցակված բաժնետոմսերը և հայկական բրոքերների միջոցով հասանելի արտասահմանյան բաժնետոմսերը։

Հայաստանի ֆոնդային բորսայում առևտրի ենթակա բաժնետոմսեր

Հայաստանի բաժնետոմսերի շուկան բաղկացած է Հայաստանի ֆոնդային բորսայում առևտրի թույլատրված բաժնետոմսերից, որը հայտնի է նաև որպես AMX անվանմամբ։ Այս բաժնետոմսերը սովորաբար կարելի է գնել և վաճառել արժեթղթերի շուկայի մասնակից բանկերի և լիցենզավորված ներդրումային ընկերությունների միջոցով։

Այնուամենայնիվ, AMX-ում առևտրի ենթակա հայկական ընկերությունների թիվը համեմատաբար սահմանափակ է։ 2026 թվականի հունիսի դրությամբ AMX-ում հասանելի են եղել հետևյալ 12 ընկերությունների բաժնետոմսերը։

Ներդրողները սովորաբար բաժնետոմսեր չեն գնում անմիջապես AMX-ից։ Փոխարենը նրանք բացում են բրոքերային և արժեթղթերի հաշիվ բանկում կամ ներդրումային կազմակերպությունում և ներկայացնում գնման հայտ։ Բրոքերը կատարում է գործարքը, իսկ բաժնետոմսերը գրանցվում են ներդրողի արժեթղթերի հաշվում։

Կարևոր է հասկանալ, որ ընկերության առկայությունը AMX-ում միշտ չէ, որ նշանակում է, որ դրա բաժնետոմսերով հաճախակի է առևտուր կատարվում։ Հայաստանի բաժնետոմսերի շուկան համեմատաբար փոքր է, և որոշ բաժնետոմսեր կարող են ունենալ սահմանափակ իրացվելիություն։ Սա կարող է դժվարացնել բաժնետոմսերը արագ գնելը կամ վաճառելը ցանկալի գնով։

Նոր բաժնետոմսերի առաջարկներ

Հայկական կազմակերպությունների համար պարտադիր չէ ցուցակված լինել AMX-ում ներդրողներին բաժնետոմսեր վաճառելու համար։ Ընկերությունը կարող է թողարկել նոր բաժնետոմսեր և կազմակերպել հանրային առաջարկ բանկի կամ լիցենզավորված ներդրումային ընկերության միջոցով։ Նոր բաժնետոմսերի առաջարկները սովորաբար հասանելի են միայն սահմանափակ ժամանակահատվածում՝ ի տարբերություն բորսայում առևտրի ենթակա բաժնետոմսերի, որոնք կարող են շարունակաբար հասանելի լինել գնման և վաճառքի համար։

Արտասահմանյան բաժնետոմսեր

Հայաստանի ռեզիդենտները կարող են նաև ներդրումներ կատարել միջազգային բորսաներում ցուցակված արտասահմանյան ընկերություններում։ Կախված բրոքերից՝ ներդրողները կարող են հասանելիություն ստանալ ԱՄՆ-ում, Եվրոպայում, Ասիայում և այլ շուկաներում առևտրի ենթակա ընկերությունների բաժնետոմսերին։

Հասանելի կարող են լինել տեխնոլոգիական, ֆինանսական, առողջապահական, էներգետիկ, սպառողական ապրանքների և այլ ոլորտների բաժնետոմսեր։ Սակայն հասանելիությունը կախված է բրոքերի գործընկերային ցանցից, առևտրային հարթակից, վճարներից, նվազագույն ներդրման պահանջներից և աջակցվող շուկաներից։

Ինչպես գնել բաժնետոմսեր Հայաստանում։ Քայլ առ քայլ

Հայաստանում ռեզիդենտները կարող են բաժնետոմսեր գնել բանկերի, լիցենզավորված ներդրումային ընկերությունների և միջազգային բրոքերային հարթակների միջոցով։ Հասանելի տարբերակները կախված են ծառայությունը մատուցող կազմակերպություններից։ Որոշները հասանելիություն են տալիս AMX-ում առևտրի ենթակա հայկական բաժնետոմսերին, իսկ մյուսները թույլ են տալիս գնել ԱՄՆ-ի, Եվրոպայի, Ասիայի և այլ միջազգային շուկաների բորսաներում ցուցակված բաժնետոմսեր։ Որոշ մատակարարներ առաջարկում են հասանելիություն ինչպես տեղական, այնպես էլ արտասահմանյան բաժնետոմսերին։

Գործընթացը հիմնականում նույնն է՝ անկախ նրանից, օգտագործում եք բանկ, թե լիցենզավորված ներդրումային ընկերություն։

Քայլ 1: Ընտրեք շուկան

Նախ անհրաժեշտ է որոշել, թե ինչ եք ցանկանում գնել՝ AMX-ում առևտրի ենթակա հայկական բաժնետոմսեր, ԱՄՆ-ում, Եվրոպայում կամ Ասիայում առևտրի ենթակա արտասահմանյան բաժնետոմսեր, թե երկուսը միասին։ Սա կարևոր է, քանի որ ոչ բոլոր բրոքերներն են հասանելիություն տալիս բոլոր շուկաներին։ Հետևաբար հաշիվ բացելուց առաջ պետք է ստուգել հասանելի բորսաները։ Հասանելի բորսաների ցանկը սովորաբար կարելի է գտնել բրոքերի կայքում։

Շատ մատակարարներ նաև տրամադրում են առցանց հարթակ կամ բջջային հավելված, որտեղ կարող եք ներկայացնել գնման և վաճառքի հայտեր և հետևել ձեր ներդրումներին։

Քայլ 2: Բացեք բրոքերային հաշիվ

Լրացրեք դիմումը և ստորագրեք բրոքերային ծառայությունների պայմանագիրը։ Սովորաբար անհրաժեշտ է լինում ներկայացնել՝

1. անձնագիր կամ նույնականացման քարտ,
2. հանրային ծառայությունների համարանիշ,
3. կոնտակտային և բնակության հասցեի տվյալներ,
4. հարկային ռեզիդենտության վերաբերյալ տեղեկատվություն,
5. տեղեկատվություն ձեր եկամտի կամ միջոցների աղբյուրների վերաբերյալ։

Որոշ բորքերներ թույլ են տալիս գրանցվել առցանց, իսկ մյուսների դեպքում կարող է պահանջվել այց մասնաճյուղ կամ գրասենյակ։

Քայլ 3: Բացեք արժեթղթերի հաշիվ

Արժեթղթերի հաշիվը հաշվառում է ձեր ունեցած բաժնետոմսերը։ Այն կարող է կոչվել նաև պահառության կամ դեպո հաշիվ։ Բրոքերային և արժեթղթերի հաշիվները սովորաբար բացվում են միասին։ Ստուգեք՝ արդյոք մատակարարը գանձում է հաշվի բացման վճար, տարեկան սպասարկման վճար կամ պահառության վճար։

Քայլ 4: Փոխանցեք գումար

Հաջորդիվ անհրաժեշտ է գումար մուտքագրել բրոքերային հաշվին։ Հայկական բաժնետոմսերը սովորաբար գնվում են հայկական դրամով։ Արտասահմանյան բաժնետոմսերի համար անհրաժեշտ է համապատասխան շուկայում օգտագործվող արժույթը, օրինակ՝ ԱՄՆ դոլար կամ եվրո։ Գումարը փոխարկելուց առաջ ստուգեք բանկի փոխարժեքը և միջնորդավճարը։

Քայլ 5: Ընտրեք բաժնետոմսը և ներկայացրեք գնման հայտ

Սովորաբար կարող եք ներկայացնել հայտերի երկու հիմնական տեսակ։ Շուկայական հայտի դեպքում բրոքերը բաժնետոմսը գնում է շուկայում առկա լավագույն գնով։ Սահմանային հայտի պարագայում բրոքերը գնում է բաժնետոմսը միայն ձեր ընտրած գնով կամ ավելի ցածր գնով։ Սահմանային հայտերը սովորաբար ավելի անվտանգ են ցածր առևտրային ակտիվություն ունեցող բաժնետոմսերի դեպքում։

Քայլ 6: Հաստատեք գնումը

Գործարքի կատարումից հետո ստուգեք գործարքի հաստատումը։ Այն պետք է ցույց տա գնված բաժնետոմսերի քանակը, գնման գինը, բրոքերային միջնորդավճարը, արտարժույթի փոխարկման ծախսը, այլ կիրառելի վճարները։ Դրանից հետո բաժնետոմսերը գրանցվում են արժեթղթերի հաշվում։

Քայլ 7: Ստացեք շահաբաժիններ

Եթե ընկերությունը հայտարարում է շահաբաժին, վճարումը ավտոմատ կերպով մուտքագրվում է ձեր բրոքերային հաշվին, դրամական հաշվին կամ կապված բանկային հաշվին։ Շահաբաժին ստանալու համար ընկերության կողմից սահմանված ամսաթվին դուք պետք է ունենաք բաժնետոմսեր։ Սովորաբար առանձին դիմում ներկայացնելու անհրաժեշտություն չկա։

Քայլ 8: Վաճառեք բաժնետոմսերը

Բաժնետոմսերը վաճառելու պարագայում ներդրողը ներկայացնում է վաճառքի հայտ բրոքերի հավելվածի, առցանց հարթակի կամ բրոքերային բաժնի միջոցով։ Կարելի է ներկայացնել շուկայական կամ սահմանային հայտ։ Շուկայական հայտը վաճառում է լավագույն հասանելի գնով։ Սահմանային հայտը վաճառում է միայն ձեր ընտրած գնով կամ ավելի բարձր գնով։ Վաճառքը կատարվում է միայն այն դեպքում, երբ առկա է գնորդ։

Հաշվարկից հետո վաճառքից ստացված գումարը մուտքագրվում է ձեր բրոքերային կամ դրամական հաշվին։ Բրոքերը պահում է վաճառքի միջնորդավճարը և այլ կիրառելի վճարները։ Այնուհետև կարող եք այդ գումարով գնել այլ արժեթուղթ կամ փոխանցել այն ձեր բանկային հաշվին։

Ի՞նչ վճարներ պետք է հաշվի առնել

Հայկական բանկի կամ ներդրումային ընկերության միջոցով բաժնետոմսեր գնելիս պետք է հաշվի առնել հետևյալ հնարավոր ծախսերը։

1. Բրոքերային հաշվի բացում։ Սսովորաբար անվճար։
2. Արժեթղթերի հաշիվ և պահառություն: Հաճախ անվճար կամ մոտ 5,000 ՀՀ դրամ տարեկան։ Որոշ բրոքերներ գանձում են տարեկան մոտ 0.19%-ից մինչև 1%՝ կախված պորտֆելի արժեքից։
3. Հայկական բաժնետոմսերի գնում կամ վաճառք: Հայկական բաժնետոմսերի գնում կամ վաճառք. Սովորաբար գործարքի 0.1%-ից մինչև 0.3%, նվազագույն վճարով՝ մոտ 500-ից մինչև 5,000 ՀՀ դրամ մեկ հայտի համար։
4. Արտասահմանյան բաժնետոմսերի առցանց գնում կամ վաճառք: Սովորաբար 0.1%-ից մինչև 0.25% կամ մոտ 0.01-ից մինչև 0.02 ԱՄՆ դոլար մեկ բաժնետոմսի դիմաց։ Նվազագույն միջնորդավճարները հաճախ կազմում են 1-ից 5 ԱՄՆ դոլար ԱՄՆ շուկաների համար և 1-ից 5 եվրո եվրոպական շուկաների համար։
5. Արտարժույթի փոխարկում: Սովորաբար մոտ 0.1%-ից մինչև 0.5%, ինչպես նաև փոխարժեքի տարբերությունը։
6. Մուտքագրումներ և ելքագրումներ: Տեղական փոխանցումները հաճախ անվճար են։ Միջազգային ելքագրումները և արժեթղթերի փոխանցումները կարող են արժենալ 0%-ից մինչև 3% կամ ներառել ֆիքսված վճար։

Եզրակացություններ

Հայաստանում բաժնետոմսեր գնելը դարձել է ավելի հասանելի բանկերի, լիցենզավորված ներդրումային ընկերությունների և առցանց բրոքերային հարթակների միջոցով։ Ներդրողները կարող են ընտրություն կատարել AMX-ում առևտրի ենթակա հայկական բաժնետոմսերի, միջազգային բորսաներում ցուցակված արտասահմանյան բաժնետոմսերի և որոշ դեպքերում՝ նոր կամ չցուցակված բաժնետոմսերի առաջարկների միջև։

Նախքան ներդրում անելը կարևոր է համեմատել յուրաքանչյուր բրոքերի առաջարկած շուկաները, առևտրային միջնորդավճարները, նվազագույն հայտի վճարները, պահառության վճարները, արտարժույթի փոխարկման ծախսերը և գումարի դուրսբերման պայմանները։ Կարևոր է նաև ուսումնասիրել ընկերությունը, հասկանալ շուկայական և սահմանային հայտերի տարբերությունը և հաշվի առնել, թե որքան հեշտ կլինի հետագայում վաճառել բաժնետոմսերը։

Բաժնետոմսերը կարող են եկամուտ ապահովել շահաբաժինների և գնի աճի միջոցով, սակայն եկամտի ոչ մի աղբյուր երաշխավորված չէ։ Գները կարող են նվազել, շահաբաժինները կարող են կրճատվել կամ չեղարկվել, իսկ ցածր իրացվելիություն ունեցող բաժնետոմսերը կարող է դժվար լինել վաճառել։ Այդ պատճառով ներդրողները պետք է սկսեն այնպիսի գումարից, որը կարող են իրենց թույլ տալ երկար ժամանակ պահել ներդրման մեջ, և խուսափեն բաժնետոմսեր ընտրելուց միայն վերջին ժամանակաշրջանի գների շարժի հիման վրա։